Битката во ткн десен блок на партии во РМ е решавачката за ДПМНЕ...
два текста како вовед (знам дека е веке постиран)
Георгиевски и Бошкоски му откажуваат на Црвенковски
Од партијата на Бошкоски велат дека идеолошки не му припаѓаат на блокот на Црвенковски
Оливера Војновска
Партиите на Јован Манасиевски, на експремиерот Љупчо Георгиевски и на поранешниот министер за внатрешни работи Љубе Бошкоски остануваат надвор од опозицискиот фронт што го подготвува лидерот на СДСМ, Бранко Црвенковски. Како сигурни партнери во овој опозициски сојуз се спомнуваат либералите на Стојан Андов, НСДП на Тито Петковски, Нова алтернатива на Ѓорѓи Оровчанец и Партијата на слободни демократи на Љупчо Јордановски. Три партии - ЛДП, ВМРО-Народна и Обединети за Македонија не се гледаат во друштво на Црвенковски и се определени за самостоен настап на парламентарните избори. Независно дали тие ќе бидат во редовниот термин во 2012 година или предвремени.
Наспроти тврдењата дека Бошкоски и Црвенковски со здружени сили ќе го нападнат Груевски, во Обединети за Македонија не се гледаат во опозицискиот фронт на лидерот на СДСМ. Потпретседателот на Обединети за Македонија, Златко Кескоски, вели дека нивната идеја како партија е да се смени перцепцијата за македонскиот политичар, бидејќи „ државата 20 години ја водат депресивни безидејни политичари“.
„Ние сме десничарска народна партија со демохристијанска ориентација и идеолошки не му припаѓаме на блокот што го формира Црвенковски. Обединети за Македонија е опозиција на десницата што е моментно на власт. На изборите ќе се случи судир на партии со иста политичка провиниенција, при што ќе покажеме дека ова ВМРО-ДПМНЕ воопшто ја нема идеолошката матрица на десницата. Груевски ќе го снајде тоа што мисли дека никогаш нема да го
снајде“, вели Кескоски. Па, изразувајќи се сликовито додава: „Груевски е како камен што се тркала по удолницата и едноставно не може да запре“.
Лидерот на ВМРО-Народна, Марјан Додовски, е уверен дека токму неговата партија е таа што од страната на десницата може да му го зададе најсилниот удар на Груевски. Тој смета дека партијата на Бошкоски нема да има успех на изборите, оценувајќи дека гласовите што повратникот од Хаг ги освои на претседателските избори се рефлексија на неговиот престој во Шевенинген.
„Бошкоски ги доби гласовите најмногу поради бекграундот на паталец, исто како што Руфи Османи победи во Гостивар на локалните избори. Но, тоа нема да се случи на парламентарните избори“, уверен е Додовски. Тој вели дека со партијата на Бошкоски немаат никаква допирна точка, а немале ниту комуникација. Според него, ВМРО-Народна моментно е позиционирана како двојна опозиција, на ВМРО-ДПМНЕ и на СДСМ. „Ние имаме свој политички концепт за организирање на партијата и за настап на парламентарните избори. И не сакаме да не' врзуваат со никого затоа што сме единствена партија што настапи самостојно на локалните избори во 2005 година, на парламентарните во 2006 и на локалните во 2009 година. Таква определба имаме и за следните избори“, вели Додовски. Притоа напомнува дека како десна партија точно го лоцирале својот таргет на гласачи. Иако партијата, чиј почесен претседател е Георгиевски, воопшто не учествуваше на изборите во 2008 година, според Додовски, нивните анализи и процени им укажувале дека „по следните парламентарни избори ВМРО-Народна ќе биде фактор за составување влада“. Оптимизам му влева и последната анкета на ИРИ, според која имаат рејтинг еден и заедно со ЛДП го делат третото место во македонскиот политички блок.
Потпретседателот на ЛДП, Андреј Жерновски, вели дека Црвенковски сака да биде носител на опозицијата, единствен и главен авторитет во овој блок. Варијанта која, според него, најмногу му одговара на Груевски.
„ЛДП смета дека политичката битка со Груевски ќе биде далеку поефикасна ако тој и неговата ВМРО-ДПМНЕ се соочат со напади од три фронта. Односно, од страната на левицата да го напаѓаат СДСМ и НСДП, од десницата ВМРО-Народна и Обединети за Македонија и ЛДП од центарот.
Манасиевски во минатонеделното интервју за нашиот весник прогнозира дека на планот на евроинтеграциите во јуни ќе бидеме соочени со уште едно вето и единствена логична разврска на политички план би било распишување нови избори, налето или наесен.
„Политичката логика води кон нови избори и како партија веќе почнавме интензивно да се подготвуваме. Го привршуваме тимот за изработка на изборната платформа на ЛДП и, најверојатно, до крајот на месецов ќе го формираме штабот за изборите“, најави тој. Лидерот на ЛДП е дециден дека на изборите излегуваат „самостојно, надвор од таборот на Црвенковски“, бидејќи, според него, тој е „стигматизиран и не може да го победи Груевски на избори“.
Премиерот и лидер на десницата, Никола Груевски, постојано уверува дека не планира нови вонредни избори. И спикерот Трајко Велјаноски во настапот на емисијата X/0 на телевизијата Канал 5 тврдеше дека „сигурно нема да има избори во 2010 година“. Сепак, никој не верува дека нема да се повтори приказната од 2008 година. Напротив, партиите ја вклучија тревогата и се растрчани на терен како утре да има избори. (О.В.