„ВРЕМЕ“ 25.02.2011
http://vreme.com.mk/DesktopDefault.aspx?tabindex=0&tabid=1&EditionID=2251&ArticleID=156947ЕКСПРЕМИЕРОТ ГЕОРГИЕВСКИ СЕ ВРАЌА ВО ПОЛИТИКАТА
Поранешниот премиер Љупчо Георгиевски, прв лидер на ВМРО-ДПМНЕ и почесен претседател на вонпарламентарната ВМРО-народна партија, ќе се врати во центарот на политичките збиднувања и на следните парламентарни избори ќе биде носител на листа во една од шесте изборни единици. Георгиевски ова го потврди во интервју за телевизијата „А1“ најавувајќи дека практично од 20 март, кога ќе се одржи Генералното собрание на партијата, официјално ќе ја почне битката за освојување гласачи. Претседателот на ВМРО-НП, Марјан Додовски, прогнозира дека јавното ангажирање на Георгиевски гарантира оти партијата ќе освои најмалку 10 пратенички места, кои ќе им обезбедат сигурно учество во формирањето на идната влада. Тој тврди дека во партијата се враќа старото членство на ВМРО-НП, кое, кога се формираше партијата на Љубе Бошковски, во првиот бран отиде кај него со големи очекувања дека сериозно ќе ја раздвижи политичката сцена. Иако во последно време се реактуализира идејата за обединување на помалите партии на десницата против владејачката ВМРО-ДПМНЕ, Додовски вели дека е речиси извесно оти ВМРО-НП ќе настапи самостојно на следните избори. Познавачите на состојбите се убедени дека Георгиевски секогаш може да смета на своите верни приврзаници, таканаречени љупчовисти, кои во земјава, според нивните процени, ги има повеќе од 50.000, најмногу во источна Македонија и во охридскиот регион. -
Георгиевски нема да ги остави рамнодушни Македонците на следните избори бидејќи со секое излегување во јавноста, цел месец го држи народот буден - објаснува универзитетскиот професор и политички аналитичар Јове Кекеновски[/b], кој воопшто не е изненаден од одлуката на поранешниот премиер да излезе на избори. Тој
потсетува дека, откако тој јавно се декларирал како Македонец со бугарски корени, може да смета на поддршка од сите што се чувствуваат како Бугари во Македонија, како и на старите вмровци, кои во ова време останаа доследни на својот прв лидер. Дел од политичките аналитичари, пак, коментираат дека Љубчо Георгиевски одамна го достигнал зенитот на својата политичка моќ и дека, практично, е невозможно да се крене од пепелот поради тоа што тој веќе подолго време е неактивен во политиката и само одвреме-навреме со контроверзни изјави ја бранува јавноста. - Георгиевски е митолошка фигура од едно време кое веќе е далеку зад нас. Илузорно е да се очекува повторно да воскресне и да ја освои политичката сцена. Особено поради фактот дека партијата во која членува, практично, е невидлива во денешната политика и со самото нејзино појавување не можеме да очекуваме да освои 10 пратенички мандати - вели политикологот Владимир Божиновски. Тој претпоставува дека нема да се случат никакви поместувања и дека пратеничките места ќе бидат поделени меѓу најголемите партии ВМРО-ДПМНЕ и СДСМ и албанските партии. - Самиот Донтов модел секогаш им дава предност на посилните политички партии со распределбата на гласовите. Така, за да освои ВМРО-НП десет пратеници, за нив треба да гласаат 150.000 гласачи, што во овој момент е илузија - вели Божиновски. Георгиевски во изминатите пет-шест години се држеше настрана од дневно-политичките збиднувања. Сепак, како претседател на фондацијата што го носи неговото име, одвреме-навреме се појавуваше во јавноста со свои ставови за клучни политички збиднувања, како состојбата со името, лустрацијата... Тој последен пат директно учествуваше во изборна трка во 2006 година, како носител на листата на ВМРО-НП во петтата изборна единица.
Автор
Тема: Народна vs Бошковски vs ДПМНЕ (Прочитано 43757 пати)